Mae Caru Coed y Brenin wedi’i wahodd i gyflwyno cais terfynol i reoli a datblygu Canolfan Coed y Brenin, gyda’r nod o sicrhau bod y safle byd-enwog yn cael ei redeg gan y gymuned, er budd y gymuned.
Mae cryn amser wedi mynd heibio ers i Caru Coed y Brenin roi diweddariad cyhoeddus ynglŷn â dyfodol Coed y Brenin. Fodd bynnag, mae gwaith sylweddol wedi bod yn digwydd y tu ôl i’r llenni.
Yn dilyn trafodaethau manwl, penderfynodd y grŵp fwrw ymlaen â chais i redeg Coed y Brenin fel menter gymdeithasol. Sefydlwyd Caru Coed y Brenin yn wreiddiol er mwyn gwrthwynebu’r bwriad i gau’r ganolfan. Roedd y penderfyniad i ymgymryd â’r broses ymgeisio yn un pwysig, o ystyried y gwaith sylweddol sydd ynghlwm â datblygu cais cynhwysfawr a’r cyfrifoldeb mawr o redeg canolfan sydd ag enw da rhyngwladol.
Roedd y grŵp yn teimlo bod rhaid manteisio ar y cyfle i ddiogelu dyfodol y ganolfan a’r llwybrau. Mae Caru Coed y Brenin am sicrhau bod y safle’n cael ei reoli gan gorff sydd â’r arbenigedd, yr ymrwymiad a’r weledigaeth hirdymor angenrheidiol, gan gadw cymaint â phosibl o’r budd economaidd a chymdeithasol ym Meirionnydd ac yng Nghymru.
Ym mis Mawrth 2026, cyflwynodd Caru Coed y Brenin gais cynhwysfawr mewn ymateb i Gais am Gynnig gan Cyfoeth Naturiol Cymru. Roedd y cais yn cyflwyno’r achos strategol a gweithredol dros reolaeth gymunedol, ynghyd â model ariannol manwl, strwythur arfaethedig y fenter gymunedol a chynlluniau cychwynnol ar gyfer datblygu’r safle.
Yn ystod y misoedd dilynol, gofynnodd Cyfoeth Naturiol Cymru am ragor o wybodaeth am agweddau penodol ar y cais. Darparwyd yr wybodaeth ychwanegol hon gan Caru Coed y Brenin o fewn yr amserlen ofynnol.
Ar 2 Medi, gwahoddwyd Caru Coed y Brenin i gyflwyno ei gynigion i banel o naw aelod o staff Cyfoeth Naturiol Cymru, ynghyd â chynrychiolydd o’r gymuned leol. Roedd y cyfarfod yn gyfle gwerthfawr i’r grŵp esbonio eu gweledigaeth, trafod eu cynlluniau’n fanwl ac ymateb i gwestiynau’r panel. Cafwyd hefyd eglurhad pellach gan Cyfoeth Naturiol Cymru am gamau nesaf y broses.
Mae Caru Coed y Brenin bellach wedi’i wahodd i gyflwyno cais terfynol erbyn diwedd mis Hydref 2026. Bydd y cam hwn yn cynnwys cynllun busnes ehangach a gwaith cynllunio gweithredol ac ariannol manylach.
Er mwyn cryfhau’r cais, mae’r grŵp wedi ehangu ei dîm drwy groesawu tri aelod newydd sydd ag ystod eang o sgiliau a phrofiad perthnasol.
Mae’r tîm hefyd yn trafod â sefydliadau allweddol, gan gynnwys Cyngor Gwynedd, Awdurdod Parc Cenedlaethol Eryri, Croeso Cymru a Bwrdd Uchelgais Economaidd Gogledd Cymru. Nod y trafodaethau hyn yw datblygu cynnig cydlynol a chynaliadwy a fydd yn sicrhau bod Coed y Brenin yn parhau i fod yn ased pwysig i’r gymuned leol, i’r economi ranbarthol ac i ymwelwyr o Gymru a thu hwnt.
Dywedodd Rhys Llywelyn, Cadeirydd Caru Coed y Brenin:
“Nid penderfyniad hawdd oedd ymrwymo i’r broses hon. Rydym yn gwbl ymwybodol o faint y cyfrifoldeb sydd ynghlwm â rhedeg canolfan o statws Coed y Brenin, ond rydym hefyd yn credu bod hwn yn gyfle unigryw i greu dyfodol cadarn a chynaliadwy i’r safle.
“Ein gweledigaeth yw gweld Coed y Brenin yn cael ei redeg gan y gymuned, er budd y gymuned, gan ddiogelu’r llwybrau, gwella profiad ymwelwyr a sicrhau bod y budd economaidd yn cael ei deimlo ledled Meirionnydd a’r economi ehangach yng Nghymru.
“Rydym yn ddiolchgar iawn am y gefnogaeth sydd wedi’i rhoi i’r ymgyrch hyd yma. Mae llawer o waith o’n blaenau cyn diwedd mis Hydref, ond rydym yn benderfynol o gyflwyno’r cais cryfaf posibl.”
Disgwylir i ganlyniad y broses gael ei gyhoeddi tua chanol mis Rhagfyr. Os bydd y cais yn llwyddiannus, y bwriad fydd lansio cynnig cyfranddaliadau cymunedol, gan roi cyfle i bobl a sefydliadau gefnogi datblygiad Coed y Brenin a bod yn rhan o’i ddyfodol.
Bydd Caru Coed y Brenin yn rhannu rhagor o wybodaeth am y cynlluniau a’r cyfleoedd i gefnogi’r fenter wrth i’r broses fynd rhagddi.
Leave a Reply